ಪ್ರಶಾಂತ್​ ಸಂಬರ್ಗಿಗೆ ಕೊಲೆ ಬೆದರಿಕೆ..! ರಾಮೇಶ್ವರಂ ಕಫೆ ಉಲ್ಲೇಖ, ಎಫ್​ಐಆರ್​ ದಾಖಲು

Prashanth Sambargi threat message : ಬಿಗ್‌ ಬಾಸ್‌ ಮಾಜಿ ಸ್ಪರ್ಧಿ ಪ್ರಶಾಂತ್​ ಸಂಬರ್ಗಿಗೆ ಬೆದರಿಕೆ ಸಂದೇಶ ಬಂದಿದೆ. ವಾಟ್ಸಪ್​ ನಂಬರ್​ ಮತ್ತು ಇಮೇಲ್​ ಮೂಲಕ ಪ್ರಶಾಂತ್​ ಹಾಗೂ ಅವರ ಕುಟುಂಬಕ್ಕೆ ಕೊಲೆ ಬೆದರಿಕೆ ಒಡ್ಡಲಾಗಿದೆ. ಅಲ್ಲದೆ ಅವರ ಮೇಲೆ ಆ್ಯಸಿಡ್​​ ಹಾಕುವುದಾಗಿ ಅಪರಿಚಿತರು ಎಚ್ಚರಿಕೆ ನೀಡಿದ್ದಾರೆ.

ಈ ಕುರಿತು ಪ್ರಶಾಂತ್​ ಸಂಬರ್ಗಿ ಅವರು ಬೆಂಗಳೂರಿನ ಚೆನ್ನಮ್ಮನಕೆರೆ ಅಚ್ಚುಕಟ್ಟು ಪೊಲೀಸ್​ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ. ವಿದೇಶಿ ಮೊಬೈಲ್​ ಸಂಖ್ಯೆಗಳಿಂದ ಬಂದ ಸಂದೇಶದಲ್ಲಿ ಸಂಬರ್ಗಿ ಕುಟುಂಬವನ್ನು ಬಲಿ ಪಡೆಯುವುದಾಗಿ (Prashanth Sambargi gets threat message) ಕಿಡಿಗೇಡಿಗಳು ಎಚ್ಚರಿಕೆ ನೀಡಿದ್ದಾರೆ.

ಮಾರ್ಚ್​ 10ರ ಮಧ್ಯರಾತ್ರಿಯಿಂದ ಈ ಸಂದೇಶಗಳು ಬಂದಿವೆ. ನನ್ನ ಮೊಬೈಲ್​ ಹ್ಯಾಕ್​ ಮಾಡಲಾಗಿದ್ದು, ಖಾಸಗಿ ಮಾಹಿತಿ, ಕಾಲ್​ ರೆಕಾರ್ಡ್​ ಹಾಗೂ ಇಮೇಲ್​ಗಳನ್ನು ಟ್ರಾನ್ಸ್​ಫರ್​ ಮಾಡಲಾಗಿದೆ ಎಂದು ಪ್ರಶಾಂತ್​ ಸಂಬರ್ಗಿಯವರು ತಮ್ಮ ದೂರಿನಲ್ಲಿ ಉಲ್ಲೇಖಿಸಿದ್ದಾರೆ.

ಇನ್ನು ಪ್ರಶಾಂತ್‌ ಅವರಿಗೆ ಬಂದ ಸಂದೇಶಗಳಲ್ಲಿ ರಾಮೇಶ್ವರಂ ಕೆಫೆ ಉಲ್ಲೇಖಿಸಲಾಗಿದ್ದು, ಬಾಂಬ್​ ಸ್ಪೋಟದ ನಂಟು ಇರುವುದು ಕಂಡುಬಂದಿದೆ. ಅಂದಹಾಗೆ ಬಾಂಬ್‌ ಸ್ಪೋಟದ ಬಳಿಕ ರಾಮೇಶ್ವರಂ ಕೆಫೆ ಉದ್ಘಾಟನೆಗೆ ಪ್ರಶಾಂತ್‌ ಸಂಬರ್ಗಿ ಹೋಗಿದ್ದರು.